Address: 黃大仙正德街103號黃大仙中心南館LG01號舖
Tel.: 2617 1363
設加一服務費
設訂座: YES
========================
幾個月前去過炑八食烤肉, 一試便愛上, 事隔幾個月, 屋企附近炑八都開左分店喇!! 呢間新分店仲要勁近黃大仙地鐵站, 一分鐘即可到達! 非常方便...
之前BOOK定檯新年前收爐當晚, 近近地同家人去呢度食團年飯~ 店內環境寬闊, 而且沒有太多油煙既焗促感, 抽風做得唔錯!
亦設有卡位, 坐得比較舒服.一坐低先有幾款前菜, 沙律開開胃... 前菜係無限量添加~
落好ORDER之後, 店員先為我地開爐, 準備爐上既蛋同埋芝士栗米, 好等烤肉黎到既時候, 可以立即烤...
【1++韓牛 巨大牛小排】HK$188
一心想黎食呢款1++韓牛, 所以前一日book位已經落定order預留~ (緊記呢款牛係要預先訂定ga, walkin既話係未必咁好彩食到, 事關餐廳唔會入太多貨, 保証到1++韓牛天天新鮮)
呢塊巨大牛小排超級大塊, 雖然唔係厚切, 但成塊面積仲大過我塊面~ 色澤新鮮, 稍為煎兩煎即食, 肉質鮮嫩多汁, 正啊!!
【韓牛珍貴部位拚盤 (貝身肉,西冷扒,肩押肉,牛五花肉】HK$568
本身自己都好中意食牛, 所以黎到不得不試一下呢度既拼盤, 眾所周知韓牛相當矜貴, 手掌般大都要幾百蚊一塊, 以呢個價錢可以食到咁多款韓牛, 而且新鮮, 一個字 "值!"
貝身肉入口juicy, 邊位有些少根, 牛肉好林, 入口有豐富既牛脂肪, 牛味較重...
牛五花肉相對冇咁重牛味, 肉有少少根, 有o趙口
西冷扒既脂肪分佈平均, 薄切, 跟一般西餐廳食既西冷扒口感有點不同, 但肉質夠林
肩押肉 肉質比較嫩口, 牛味適中...
【生牛肉石頭鍋飯】HK$128
本身好怕食生牛肉, 自己腸胃比較差, 如果食左唔新鮮既生牛肉,就好易肚痛...不過事隔幾日打呢篇食評, 証明左呢度既生牛肉的確新鮮! 以石頭鍋飯熱辣辣,香噴噴上檯...
上面有隻生蛋, 上檯後, 店員會先問一下我地想要既辣度而加入辣式辣醬, 在攪拌時, 石鍋既熱將生牛肉稍為整熟, 配上大量既配菜, 滿足到豐富口感! 食到底仲有脆卜卜既飯焦食tim...
【炑八厚切五花腩配特製韓國魚醬】HK$128
出面食五花腩大多都切開一片片, 但呢度既五花腩突顯重量級, 厚條五花腩上檯, 脂肪層唔算太厚, 夾起黎肉質幾實...
燒既時候原條放上爐, 每邊稍為煎成金黃色, 能鎖住肉汁, 千萬唔好全熟, 否則食落口感太硬...
以生菜包住呢款五花腩, 點少少醬一齊食, 係韓國既正宗食法,
因為脂肪分佈於腩肉間, 所以食起上黎, 軟硬適中, 不過覺得個皮稍為硬左D, 過於煙煙韌韌~
【草莓塔】HK$68
睇到Menu上既野飲, 特別令我心心眼既係呢杯草莓塔, 亦只係黃大仙分店所限定, 其他分店係冇ga!! 整杯野飲以士多啤梨做主角, 內有士多啤梨沙冰, 沙冰打得好幼細, 加上上層既cream, 飲起上黎更顯幼滑, 除左上層佈滿粒粒士多啤梨外, 中層貼近杯邊更有士多啤梨,
酸酸甜甜既士多啤梨, 配上冰凍微甜既士多啤梨沙冰, 賣相吸晴之餘, 又非常解渴, 正!!
【炑八朱古力蛋糕冰沬】HK$68
最後食埋呢個甜品, 食之前因應個人喜好加入朱古力醬, 香濃朱古力蛋糕+Oreal, 配合刨冰, 整體味道唔算過甜, 絕對係食完烤肉降溫既首選! 份量都幾大, 建議兩個人share都夠哂飽!!
沒有留言:
張貼留言