來台南玩，想搵一間位置核心、服務同質感兼備嘅五星酒店，台南晶英一定係首選之一。酒店座落台南中西區，鄰近小西門商圈，周圍古蹟、美食密集，落咗酒店就可以直接展開台南美食之旅，地理位置絕對加分。
✨ Lobby｜中式氣派大廳，細位充滿中藝術感
一踏入大堂超高樓底夠震撼，整個空間以中式設計做主調，木製花窗、大鼓裝置，充滿古都文藝氣息，低調又有氣勢。
辦理 CHECK-IN 嘅時候，職員會送上熱茶招待，最令人驚喜係每隻茶杯都係手製陶杯，獨一無二，杯身仲刻有平安等字樣。大堂另一邊設有闊落舒適嘅休憩區，等房或者休息坐一陣都好舒服，唔會有壓逼感。
🛏️ 今次入住｜行政小西門和洋套房
今次揀咗行政小西門和洋套房，超大空間感，和洋交融設計，有獨立客廳同睡眠區，唔似一般酒店房咁壓迫。近窗邊設有一和風會客區，打卡一流。
浴室備有浸浴設備，酒店會供應浴鹽，一日行完台南街，返房浸個浴，即刻卸哂疲勞。
酒店行政樓層仲有其他房型可以揀，包括行政海東客房、行政府城套房，無論二人旅行，或者多人家庭都可以搵到合適選擇。
🏊 酒店設施｜親子、休閒一應俱全
酒店設施選擇好多，唔使周圍走，留喺酒店都可以玩足一日：
- 兒童遊玩區（小學堂），帶小朋友嘅家庭可以放電
- 戶外泳池，天氣好嘅時候打卡游水一流
- Gym room 健身中心，想保持運動習慣都得
無論情侶慢活度假，定係親子旅行，設施都夠晒全面。
🍽️ 餐飲體驗｜ROBIN'S鐵板燒、行政酒廊、早餐大推
1. ROBIN'S鐵板燒
酒店入面設鐵板燒餐廳，供應半自助鐵板燒套餐。現場師傅即席烹調，食物質素穩定，搭配自助吧，用餐體驗豐富，想喺酒店食大餐就可以揀呢度。
2. 行政酒廊 Happy Hour
行政酒廊有小酒吧，Happy Hour 時段可以歎酒。呢度最有玩味係多款唔同造型酒器，每款都好有特色，大家玩到樂而忘返，氣氛超正。
3. 自助早餐
早餐種類非常豐富，分別有兩間餐廳供應中式同西式食物，兩者同樣提供台南地道牛肉湯，唔使特登一早出門排隊，喺酒店就飲到。
中式區仲有點心車、港式蛋撻等。食早餐期間會播住廣告歌，氣氛輕鬆熱鬧。
4.晶英軒
酒店入面有高級台菜料理--晶英軒，
完全滿足視覺同味覺享受，特別推介：
火焰石燒竹地雞三吃
一雞三食，仲有火焰上菜表演，視覺效果好震撼。第一食品嘗香噴噴爐烤竹地雞，皮香肉嫩；仲搭配紅蟳同鮮甜嘅雞湯，湯底融合蟹鮮同雞香，配埋粟米同蘑菇，飲落好滋潤。
超巨型古早風味燒冷冰
呢個係台灣好特別嘅傳統冰品。成個甜品送上檯嘅時候煙霧四起、仙氣飄飄，畫面超夢幻，打卡一流。
熱滾滾嘅特製醬料當場淋落細滑嘅刨冰上面，冷熱瞬間碰撞，冰塊微微溶化，口感層次好獨特。入口既有醬料嘅濃厚香氣，又有刨冰嘅冰涼清爽，甜而不膩，清爽解膩。
有儀式感嘅蟹鍋，呢個係桌邊即席料理。熱滾嘅鍋擺上檯之後，先將新鮮蟹同一大堆時令鮮蔬逐樣即席放入鍋入面，蟹嘅鮮甜精華全部滾出嚟融入湯底，再吸埋各樣蔬菜嘅清甜，成個湯頭鮮甜濃厚，飲落完全唔會腥。
💡總結
台南晶英唔單止位置優越，由大堂、房間、設施到餐飲，好多細節都見到酒店用心。
想喺台南市中心搵五星住宿，追求舒適、想留喺酒店都有豐富體驗，行政套房呢個選擇非常值得推薦，無論情侶定親子都好適合。
📍 台南晶英酒店（Silks Place Tainan）
和意路1號, 中西區, 台南, 700
......................................
KERESAWONG.L.S'S PLATFORM:
Instagram: https://www.instagram.com/keresawong.l.s/
Facebook: https://www.facebook.com/keresawong/
Blogspot: https://keresawongls.blogspot.hk/
YouTube: https://www.youtube.com/@keresawong
