首次到珠海自由行, 怕自己唔熟路, 所以今次旅程只沿著拱北口岸(關閘--珠海過境澳門嘅關口)附近走走。
不得不讚係珠海嘅蠔又大又肥美, 超新鮮, 但食過咁多間, 都冇生食嘅蠔供應 (可能水質問題吧, 熟食較為安全) 而食過咁多間蠔, 最最最有驚喜就係呢間---蠔城橫琴生蠔海鮮火鍋。
由拱北口岸步行約兩分鐘路程, 餐廳門面光猛, 有少量座位設於室外,
餐廳門口仲有員工開蠔, 隻隻蠔都肥美脤卜卜啊!
餐廳內座位算不上舒適, 都係大眾平民化格局, 感覺幾地道, 而且店員招呼好熱情, 不停推介款式。
而我就預先睇定咗美團Apps入面嘅套餐, 其中一個二人餐就包含咗必食嘅橫琴生蠔,
又包埋湯底同雜費, 又有海鮮, 都幾抵食。另外店員就不停推介叫我地order鱔, 個人係幾中意食, 所以就叫咗一條, 撈起比我地睇, 計哂幾重幾錢先幫我地落單, 冇劏客嘅feel啦。
【蠔城海鮮生蠔雞2人餐】美團價 RMB198
包含了滋潤鍋底、花生小吃、兩位茶水醬料(RMB4/位)
招牌: 橫琴生蠔(五隻)//原價RMB50
每隻蠔均為奶白肥美脤卜卜, 店員建議放入湯底滾三分鐘食, 蠔嘅size依然好大隻冇縮水, 口感飽滿又滑, 蠔味濃郁, 確實係香港好難食到呢個質素, 推介必食!!
清遠雞(半隻):
上檯時店員見檯面冇位, 就好快直接推咗入湯底影唔切。係內地食雞就一定新鮮, 點都好食過香港, 雞皮爽, 雞肉有鮮雞味, 襯埋個清清地嘅湯底係正!
鮮活海鮮類:
羅氏蝦(半斤): 蝦好生猛, 用竹簽串住都仲識郁, 爽口鮮甜。
鮮活帶子(3隻): 有帶子嘅鮮甜, 裙邊好爽。
白貝: 肥美又鮮甜, 不過有幾隻滾極唔開(可能有沙)
魚籽福袋: 表面腐皮盡吸湯底精華, 一咬清甜湯汁+入面嘅魚籽令層次豐富。
配菜: 海帶苗、青菜拼盤
套餐包生河粉for火鍋, 不過我地就選擇咗轉炒河 (額外加差價) 打包拎走。
額外散點:
【海鱔 (RMB119/斤)】RMB140
係上檯時我用手機拍片, 先發現鱔頭chok咗野, 超新鮮, 冇掉包!
鱔切片起骨, 條鱔唔係話好粗, 但估唔到鱔皮同鱔肉都好爽口彈牙, 有鱔獨有鮮味, 超正!
呢間嘅蠔同埋鱔, 成為我呢轉珠海之類最回味嘅Top 3排名之一, 下次定必會再幫襯!
.
蠔城橫琴生蠔海鮮火鍋
營業時間：上午11時至凌晨5時
地址：珠海市香洲區桂花南路88號
電話：13075655955
沒有留言:
張貼留言