流浮山【球記海鮮酒家】中伏無味求其海鮮餐

🚩餐廳名稱：球記海鮮酒家               
📍Address: 流浮山正大街7號      
Openrice: http://www.openrice.com/zh/hongkong/r-%E7%90%83%E8%A8%98%E6%B5%B7%E9%AE%AE%E9%85%92%E5%AE%B6-%E6%B5%81%E6%B5%AE%E5%B1%B1-%E7%B2%B5%E8%8F%9C-%E5%BB%A3%E6%9D%B1-%E6%B5%B7%E9%AE%AE-r25992
營業時間：
星期一至日: 06:00-22:00
設加一服務費

我超中意食海鮮, 香港食海鮮既不外乎西貢, 三聖村同流浮山啦....
但好多人都話, 如果唔識人, 肯定自己做左水魚比人?! 今次係公司安排我地去流浮山品嚐美味海鮮,
我地一心諗住食到新鮮美味既海鮮, 點知.............中左伏!!!
呢間海解餐廳係近流浮山既入口, 入面面積唔算大, 但碗碟地方比較dirty... 碗碟中會有生蜢蟲仔, 地下會有大強打下招呼~
雖然見到檯底做左d防蟲設備, 但似乎呢間餐廳依然好受昆蟲歡迎.....
------------------------------------------------------------------------

【龍蝦伊麵 (3斤)】

早要求龍蝦以芝士烹調, 但一送到黎, 完全唔係芝士.... 估計係上湯, 都算! 個上湯淡而無味, 龍蝦係多, 而且爽既...但個伊麵極乾, 難食!

【豉椒炒蟶子】

一見到呢碟真係呆左, 豉椒炒但冇椒, 以苦瓜一齊炒, 蟶子爽, 但味道完全比苦瓜覆蓋哂!!! 浪費哂碟蟶子~~~

【蒜蓉粉絲扇貝】

送上檯意為每隻扇貝都大大隻好有份量, 點知原來帶子係被拆出來做開邊, 個底放左粉絲, 帶子上加左執蒜蓉... 講真, 帶子完全冇味, 連鮮味都冇! (同雪藏既冇分別), 粉絲蒸過龍一 pat pat..蒜蓉,粉絲,扇貝三隻味道果然好分明!

【果皮蒸鮑魚】

鮑魚雖然爽口, 但完全冇鮮味, 連果皮既香味都冇, 失望!!!

【炸蠔】

我唔食蠔既, 比左同事食, 但連同事食左一隻已經拒絕再食! 佢話隻蠔唔新鮮, 咬落去係一pat pat....

【龍躉炒球】

龍躉炒過龍, 龍躉肉比較鞋口...

【椒鹽龍躉頭腩】

呢個炸得幾好食, 好入味, 龍躉肉滑, 但骨既比較多, 無咩肉食...

【薑蔥炒蟹】

炒蟹大大碟, 終於食到碟係有味既海鮮.... 可惜半碟蟹都唔係新鮮既~ 有幾隻蟹既肉係煤的.....似乎炒死蟹似的~

【豉油王蝦】

呢個算係最好食既一樣, 蝦爽口鮮甜, 汁醬味道係鹹鹹地, 蝦都幾新鮮肥美~

【雜魚湯】

呢個湯反而好飲,幾鮮甜~

【炒飯】

很普通既楊州炒飯, 炒飯唔算粒粒分明, 而蝦係煤既...而且蝦身仲要瘀瘀黑黑...睇賣相已經唔太開胃!