銅鑼灣【奈良上釜】鮮味十足的奈良釜飯

餐廳名稱：奈良上釜  
Address: 銅鑼灣登龍街39號地舖               
Tel.: 3555 4111
設加一服務費
設訂座: Yes
==============================

銅鑼灣登龍街開左好多間日本菜, 最近又新開左間釜飯餐廳, 門外裝修得什有日本特色...入面唔算大,裝修以簡潔為主,位與位之間比較密~

呢度既釜飯一般以海鮮為主, 如果唔中意食生既刺身,亦都有熟食既鰻魚釜飯選擇~
今次我就Order左個【奈良七盛釜】, 而呢度每個set都跟前菜 - 酸蘿蔔, 麻醬豆腐,茶碗蒸

茶碗蒸 - 食材好豐富, 有海膽,三文魚子,蟹肉,東菇,日式魚片,松露, 底部有蒸水蛋...超香滑!! 除左豐富既口感, 更食到淡淡既松露香, 很喜歡呢個茶碗蒸!!

前菜之後, 就送上一個煮物: 蘿蔔+海蝦+栗米仔
鮮甜湯汁完完全全索哂入蘿蔔, 令蘿蔔非常入味,而且好林~ 隻蝦都好爽口!

食日本野一定唔少得刺身,呢度會因應每日最新鮮既刺身食材分配比客人...令每位食客都能夠食到新鮮肥美既刺身~

終於來到主菜 【奈良七盛釜】HK$288

所謂七盛包括: 蟹肉,海蝦,鮑魚,三文魚子,冬菇,白本菇,三葉~ 最吸晴當然係大大隻鮑魚啦! size大到佔左成碗飯既1/4位置...
店員先簡單介紹釜飯既食用方法, 首先將釜飯撈勻, 再將d飯放入飯碗中慢慢食, 記得將原本既釜飯蓋蓋好~ 釜飯飯碗可以短時間keep溫度~慢慢食都唔會好快凍...
釜飯以珍珠米造飯外, 特別在於係烹調過程中混入精華湯汁, 令整個飯更為與別不同, 陣陣既海鮮味, 鮮甜味十足!!雖然係烹調過程中加入湯汁, 但飯粒依然keep到粒粒分明~
刮至底部仲發現有少少飯焦, 不過同港式煲仔飯好唔同, 港式煲仔飯既飯焦係帶燶且黑, 但釜飯既飯焦帶金黃而且口感略帶煙韌...店員叮囑唔好將三文魚子放入釜飯中焗住, 免得熱力令三文魚子焗熟~將三文魚子混入飯一齊食, 三文魚子係口中爆開, 令口中魚油味更加澎湃!
先食呢個釜飯既主菜-鮑魚.........咬落非常彈牙而且滿有口感, 更食得到鮑魚既鮮味, 正!!!

釜飯另外再跟一碗味噌湯同埋少少水果, 令整個晚餐畫上完美句號...