內地同事來香港工幹, 有意品嚐香港嘅四川菜, 朋友介紹筲箕灣有間四川菜味道唔錯, 而且地點易搵, 正正就係筲箕灣電車總站, 一落車就到。
今日放工就帶內地同事坐叮叮去到呢間餐廳, 餐廳名四川重口味, 單聽個名已經聯想到今晚味蕾一定受刺激。餐廳分上下兩層, 地方乾淨闊落。
川菜定義為超辣重口味, 所以很少挑戰, 還好呢度可以自選走辣/bb辣/少辣/中辣/大大辣, 照顧返唔太食到辣嘅香港本地人。款式多, 價錢亦唔貴。
【招牌酸菜魚】HK$168
揀咗脆鯛魚, 魚質爽滑, 無骨啖啖肉, 湯底揀咗少辣, 酸辣惹味, 辣味漸漸滲出, 刺激味蕾, 愈食愈開胃; 配料亦唔少, 有大量酸菜、娃娃菜葉, 盡索了湯汁; 另有少量薯粉, 滑又帶微微煙韌, 整體好味又足料, 推介。
【川香麻辣鴨舌】HK$98
以大量辣椒、蔥段炒起, 鴨舌唔會過份收乾水份, 唔會太辣。
【麻辣豬耳】HK$58
想不到份量比預期多, 豬耳切條, 跟青瓜絲、莞茜、芝麻撈埋, 夾起同時入口, 豬耳爽脆軟骨配上清爽青瓜絲, 微微麻辣中又帶點清新。
【麻辣魷魚鬚】HK$98
大量青紅椒、洋蔥炒起, 幾有穫氣, 魷魚鬚爽而不韌。
【黃金皮蛋】HK$40
皮蛋超彈滑, 除咗辣油, 仲加咗花生碎增加了層次, 味道冇預期中咁辣。
【蒜泥白肉】HK$58
每片腩片肥瘦平均, 擺盤方便一片片卷住大量香辣蒜蓉入口, 香口惹味。
【招牌口水雞】HK$62/例牌
口水雞超鮮嫩, 個汁好惹味又香口, 如果有個飯撈就更正!
食完四川麻辣菜式, 成個口真係麻辣重口味, 要order甜品平衡一下味蕾。
【紅糖糍粑】HK$48/6條
糍粑外層酥脆, 餡料有點點黏糯, 加上了甜甜地紅糖醬, 味道唔錯。
【桃膠冰粉】HK$28
冰粉沒有預期中嘅滑, 加咗爆珠, 整體唔係好甜, 但入口冰涼啫喱感覺好正。
【紅豆燒仙草】HK$28
仙草彈滑, 加咗甜甜地紅豆蓉、爆珠, 甜甜地又有層次。
另外order咗野飲, 邊食四川菜邊解辣。
夏枯草 HK$15
柑桔檸檬蜜 凍 HK$17
.
四川重口味
筲箕灣東大街132號地下
.
沒有留言:
張貼留言