早前去太古郵局時行經呢間餐廳, 得知呢間居酒屋加入「洋食」元素再度開業, 適逢同事生日, 正好放工過黎食返餐。
餐廳裝潢以木色為主調, 牆上張貼好幾張手繪食物圖, 什有日式洋食風格, 而且食物款式多。
【菠蘿奇異果醋梳打】HK$38
餐廳自家浸製嘅果醋, 再加入梳打, 酸味味又帶有果味香甜, 清新解膩。
【雪糕脆筒吞拿魚他他】HK$83
擺盤很有特色, 吞拿魚蓉中加入了中式菜脯、韓式辣椒醬同埋海鮮醬, 食之前將脆筒敲碎, 伴上他他入口, 既食到濃郁吞拿魚魚油, 口感仲好有層次, 正!
【和風明太子薯仔沙律】HK$62
綿密薯仔蓉中釀入了明太子, 再疊上一隻流心溫泉蛋, 一篤流出豐富蛋汁, 令口感更加黏滑, 撈埋沙律菜一齊食, 食到明太子嘅鹹鮮微辣, 很有特色。
【米蘭薄炸雞排】HK$75
雞排選用了日本雞胸肉, 經刀背捶得薄薄的, 再以混合芝士粉嘅麵包糠酥炸至金黃, 雞排肉質軟林, 面層佈上野菜沙律, 中和到炸物嘅油膩感。
【二段低溫油吉列豬排】HK$128
為餐廳招牌菜, 標榜分兩次不同溫度低溫油慢炸, 吉列炸皮炸得金黃酥脆, 每卡豬扒亦帶有些少豬嘅油脂層, 脂香撲鼻。
【44 小時製作厚切北海道三元豚鐵板燒配自家製醬汁】HK$175
鐵板熱辣辣上檯, 豚肉非常厚切, 慢煮嘅豚肉肉質林得可以絲絲撕開, 肉味重, 備有三款汁醬, 分別係牛肉多蜜醬、鮮蕃茄醬、咖哩醬, 雖然汁醬倒至鐵板未至於有滋滋而散發香氣, 但將豚肉沾上不同醬汁, 別有一番風味, 其中咖哩醬最討我歡心, 咖哩味道極為濃郁美味。
【明太子忌廉烏冬】HK$108
湯汁以牛乳同埋豆乳製作而成, 口感超滑, 伴上明太子, 攪拌食, 多一點鹹鮮; 烏冬微微煙韌, 掛上了湯汁, 啖啖都食到好重忌廉味; 不過所配搭嘅配料(一條條果款), 口感偏硬得有如魚骨, 要浸林先食到。
【自家製西京味噌焦糖布甸】HK$48
全晚最最最最驚喜就係呢款甜品, 製作過程中加入了西京味噌烤至焦糖化, 布甸味道鹹甜交集, 質感有如雪糕般柔滑, 入口慢慢化開, 而布甸面層仲有焦糖脆脆, 一脆一滑嘅口感同味道都令我深深愛上!!! 超級推介!!
Bistro Maru Maru
沒有留言:
張貼留言