原來係何文田都會大學入面, 可以食到咁高質嘅中菜, 絕對值得推介!
其實除了教職員同學生, 呢間餐廳都會open比大眾去幫襯。只要跟餐廳預訂, 就會安排一個QR code進出。
餐廳環境幾有書卷氣, 有別於傳統中式酒樓/酒店, 座位舒適闊敞, 服務招呼周到, 菜式選擇多元化, 包括有傳統手工菜、摩登中菜同埋家常小炒, 最重要係食物水準有驚喜!
【黃扒魚肚金湯】HK$68
南瓜湯香滑濃郁清甜, 配上口感爽彈魚肚, 夠哂足料。
【無花果海底椰燉雞湯】HK$42
味道清甜滋潤, 帶有海底椰嘅獨特清香。
【懷舊拔絲咕嚕肉】HK$148
份量都幾多, 咕嚕肉外層脆, 平均被包裹著酸甜醬汁, 更有拔絲效果, 酸甜開胃。
【茶魚煙燻豉油雞(半隻)】HK$168
待應即席開蓋, 濃香煙燻香氣漸漸散發, 豉油雞帶有甜豉油嘅鮮甜, 兼富有煙燻香氣, 肉質嫩, 細味更有淡淡茶葉香氣。
【法式芥末蝦球】HK$148
每件炸蝦球炸皮薄而鬆脆, 平均被甜酸芥末醬包裹著, 入口甜酸芥末味香濃, 蝦球爽口彈牙, 配上脆口米通, 雙重香脆口感, 香口惹味。
【荷葉虎蝦蒜香米】HK$268
滋潤得有如意大利飯似的, 甘香鮮味, 味道濃郁, 但依然做到飯粒粒粒分明,
夾集埋蔥粒食, 香氣十足; 配有四大原隻虎蝦, 爽口彈牙, 驚喜美味, 超級推介!
【炸彩虹湯圓 配薑茶】HK$42
薑茶微甜, 薑味香辣, 岩哂驅寒; 配上軟糯流心芝麻湯圓, 另有被外層七彩脆粒包裹嘅芝麻湯圓, 外脆內軟, 香口滋味。
【牛油果甘露】HK$45
牛油果加入椰奶, 口感稠密有如奶昔般香滑, 微甜清新帶有淡淡牛油果香氣, 伴有些少柚子肉跟西米, 更有口感層次。
茶位 HK$10
MU Club
何文田牧愛街30號香港都會大學正校園A座12樓泰寧軒
.
KERESAWONG.L.S'S PLATFORM:
Instagram: https://www.instagram.com/keresawong.l.s/
Facebook: https://www.facebook.com/keresawong/
Blogspot: https://keresawongls.blogspot.hk/
沒有留言:
張貼留言