(繼續更新中)【子宮肌瘤手術歷程分享】含術前準備、過程、住院費用、術口護理、飲食

甲亢回復正常已經停藥兩年, 一直認為自己身體非常健康, 好少病痛, 自取消口罩令後, 雖然疫症、流感一直存在, 但自己係公眾場合都冇戴口罩, 認為比身體適應有免疫力比較好, 每日飲飲食食, 唔會有節制, 認為吃得是福, 每日都會服用supplement, 每服用一段時間又會轉另一款。豈料.....係身體無任何預警、心裡無任何準備下, 意外地發現....我下腹生了一個如橙般大嘅子宮肌瘤!!

子宮肌瘤 係婦女常見疾病, 平均每四個女人就有一個有, 呢種肌瘤暫時未有明確起因, 大概估計為體內雌激素分泌太多所致, 又或者係食用太多含雌激素食物。

當我得知自己生瘤後, 係網上做咗唔少資料搜集, 但發覺香港人較少分享呢個病歷、醫治、手術等...反而係小紅書較多內地人分享。

今次以親身經歷為自己留個印記, 有興趣睇嘅朋友, 可以參考啊 (詳文)

意外發現「子宮肌瘤」

五月時服用抗生素後一直便秘, 對於我呢位吃貨黎講, 日日有入冇出, 個肚谷得好辛苦, 最後我放棄服用最後兩天嘅抗生素, 轉食益生菌。日常服用益生菌都必定對我有好大幫助, 但今次服了三日, 都係便泌!! 前後超過約一星期, 先有較量少嘅出。

Jun 3, 2024 意外發現下腹有硬塊

牙肉腫痛, 左邊難以發力, 所以決定去睇西醫, 拎消炎藥食。同時告知女醫生有便秘問題後, 醫生手按我腹部, 仔細檢查後感覺到我下腹有不正常硬塊, 於是被緊急安排驗尿, 叮囑護士協助預約照超聲波 (盡快得出結果)

Jun 4, 2024 a.m - 照超聲波 (銅鑼灣)

Jun 5, 2024 a.m - 出超聲波報告

西醫要求緊急會面, 告知子宮前有一10CM大的子宮肌瘤, 出了轉介信建議盡快約見婦科醫生

Jun 12, 2024 - 婦科 鄭嘉寧醫生

由於一向沒有做婦科檢查, 只好在公司保險中隨意選一個就近的婦科醫生

醫生看過了超聲波報告+手摸下腹位置後, 指10CM的子宮肌癅全遮整個子宮, 兼壓著膀胱, 為免令其他器官受損, 建議盡快進行開刀手術 (查過這位醫生在醫學界不是太有經驗, 個人不放心她為手術的主診醫生, 所以沒有選擇她)

超級推薦 - 岑德強醫生

Jul 4, 2024 - 婦科 岑德強醫生 

這位醫生是由我舅母介紹, 係浸會醫院比較出名的婦科醫生, 後來我亦有係網上做了一點research, 確實評價相當不錯, 約見期比較耐, 但有經驗兼評價高的醫生, 就是這樣啊!

岑德強醫生 為PacifiCare中其中一位醫生, 到達診所簡單登記後, 很快就安排量血壓、度高、體重, 然後等待會診。當天等了約半小時(比預期中快), 我帶咗之前去照嘅超聲波片比醫生睇, 經判斷後, 同樣建議開刀 (但我依然不死心問, 為何不可微創?!) 

為什麼一下子我決定選擇「傳統開腹手術」?

岑醫生 為我探一下下腹, 指那個瘤大得已經上了肚臍, 他建議唯一最合適的都是傳統開刀, 同時分折過, 如果我堅持想做微創, 目前我嘅狀況係子宮肌瘤太大, 完全遮蓋子宮, 究竟子宮內仲有冇其他?? 唔知, 但岑醫生亦耐心地給我分拆狀況, 再提出兩個方案給我選擇:

A) 建議的傳統開刀手術

不但可以節省照MRI費用, 最大優勢是可以徹底快速將子宮肌癅割除, 還可以清楚看到子宮內有沒其他肌瘤, 可以一併割除。

B) 堅持微創, 照MRI

自費照MRI, 若真的只有一個大肌瘤, 可選擇微創, 但時間比傳統開刀長達三倍時間; 但萬一微創期間發覺有其他肌瘤, 當時必需同步割除, 但由於麻醉時間有限, 緊急情況下必須緊急開刀, 簡單說, 有機會雙食。

聽過後, 個人都覺得醫生詳盡分析都是合理, 我再怕都只好聽重醫生建議---決定了 傳統開刀。

然後, 岑醫生跟病人會定立手術的共同目標, 就是---徹底將子宮肌瘤去除, 保留子宮

另外, 我亦跟岑醫生提出了要求, 這個開刀手術我知道避不過, 但不想受精神上節磨, 所以我請求要當天第一台就被推進的手術室。 岑醫生亦答應了, 立即定下了手術日子, 給我簽了份手術同意書, 再給我入院資訊。

入院前心理+日常生活準備

超級怕痛嘅我選擇傳統開刀, 兼沒有把手術日子一直拖, 原因就係因為自己目標好明確! 第一就係我將來一定要生小朋友, 一定要好好保留子宮; 第二就係把手術期一直拖, 反而令我工作上無了期Delay, 影響到我schedule上安排。

手術前一星期, 每日為自己倒數, 每日恐懼感提升; 不時查看同樣患子宮肌瘤, 需要做手術的網上分享, 為自己作出心裡準備。然後, 親戚、身邊朋友飯腳亦有關心、安慰, 心理上好一點點。但最最最令我感動, 莫過於自己偶像為我打了一支特強的強心針, (內容不便公開了) 這個效能不但驅使我有動力執走佬袋, 效能還一直keep到我自行爬上了手術台上, 一點亦沒有恐懼感, 太利害了!

術前一星期, 我將自己床單被舖全換, 周邊的都打掃得乾淨。

走佬袋 (必備):

• 開胸睡衣 (後來發覺開胸睡裙比較好, 手術後需插著尿喉)
• 數條Underwear (盡量帶橡筋比較鬆的, 避免穿上束到傷口)
• 特長衛生巾 (數片, 手術後下體可能會流出分泌物)
• 面紙、濕紙巾 各一包 
• 牙膏、牙刷、面巾、抹身巾
• L型飲管 (手術後難以坐直, 飲管容易飲用)
• 身份証、入院証明、超聲波片、信用卡(入院時需支付按金)
• 保險claim form (於辨理入院手續時一併提交)
• 手機充電線

住院 Day 1:抽血、量血壓、灌腸

Jul 15, 2024 p.m - 入院

浸會醫院 - 每日13:00, 一日為計; 房間以不同等級收費:

於Lobby辦理入院手續後, 等待醫護助理帶上指定樓層

註冊護士詳細詢問病人身體狀態、藥物敏感等...收妥相關文件, 如超聲波圖、保險claim form等相關文件, 再給予驗尿樽仔當晚驗尿;

 

今次我住的是大房的第二個價錢, 每晚HK$910

醫院提供了膠的有蓋水杯、櫃的鎖頭

除了當晚交小便外, 還有抽血、量血壓、灌腸 (液體塞肛門, 從下至腸道即時感覺清涼, 需靜待15分鐘才可排出)

一心意為灌腸會肚痛得好利害兼瀉得好勁, 但原來感覺比起腸胃炎, 舒服暢快得多, 結果都只是排了一次。

大約十點半, 護士通知明早有關手術前安排, 明早7:30做手術, 6:00需換好手術袍, 在床上等待, 有安排床推至手術室。 

住院 Day 2: 開腹手術當日

Jul 16, 2024 a.m - 手術 (7:30a.m手術)

一大清早, 緊張情緒令我自然醒, 立即起身沖涼、刷牙, 換上手術袍, 護士協助穿上了壓力襪。

大約6:40, 病床到達, 躺著被推進手術室。

(由於浸會探病時間為早上10點至晚上10點) 再加上浸會手術室外沒有座位/空間給予親友等候, 

只能留在病房中等候。

手術室區域中, 還有一個供病床等候區, 

醫護助理核對個人資料、食物藥物敏感, 再有麻醉醫生給予簽署同意書, 然後就被推進手術室。

入手術室時間為7:30:

上了手術台, 左手被量血壓, 右手醫生為我種豆插入「留置針」 (岑醫生手勢好, 完全沒有痛感)

印象中還有一個呼吸罩, 全覆蓋我的口同鼻, 醫生話呢個係氧氣罩, 叫我大力呼吸, 吸了幾下我就沒知覺了。

被醫生拍醒, 就說手術成功, 已經做好了。

再被推至手術室等候區, 當時我用了微薄聲線問了一下推床的助理---現在幾點。

助理回: 現在8:30了

術後即時感覺:

整個手術於一小時內完成, 醒來麻醉藥未過, 未有感覺刀口痛楚, 已經戴上腰封固定, 只感覺有些少拉扯。

很快就被推回病房過床, 當時右手被插著具止痛作用的鹽水。

下身插著尿喉, 完全不能動。

感覺非常累, 很快我就睡覺休息了。

當日已不知被量過多少次血壓、多少次體溫, 一直好像半昏睡; 

直到下午五點左右, 家人送上魚粥, 我亦可以半躺進食到, 痛感亦不太明顯。

直到岑醫生前來巡房, 給我換上防水膠布, 輕碰了傷口, 就感到痛得要命, 連粥都食唔落。

後來, 護士給我在肛門塞了止痛藥 (一共三次, 餘下兩次為明天早晚)、服用止痛消炎藥、換了一袋消炎止痛包, 打了抗生素, 痛苦感就慢慢消了, 反而自己不小心碰到尿喉, 下體感覺刺痛一點; 整體上, 手術當晚亦沒特別事發生, 可以舒服地一覺訓天光。 

住院 Day 3: 拔尿喉、術後首次落床、當天必須排氣

Jul 17, 2024 - 拔尿喉

一大清早7:30左右, 病房著燈, 量血壓、醫護助理協助提供梳洗用品。

由於插著尿喉未能落床, 醫護助理給予紙盤, 在床上沖沖口; 

岑醫生巡房, 查看傷口狀況; 吩咐護士今天可以幫忙拔尿喉, 建議落床多走動。

醫護助理跟護士協助換上自己帶來嘅衣服,

約8:30護士入黎拔尿喉, 刺痛感只有一下, 還可接受。

然後有護士就追著要我落床行下, 對傷口復原好一點。

手術前認為落床亦是最痛苦的一環, 但感覺比我預期易得多, 助理教雙手緊握床邊扶手起身坐著, 抱實痛的位置, 定下來一陣子再吸一口氣, 雙腳落地撑著站起來。想不到, 我一下子就站到, 自己可以慢慢行, 刀口亦沒有明顯痛感。

每次小便, 都要係座廁上放上一個飛碟, 盛好小便, 再通知醫理員作記錄。

為免忍尿谷爆傷口, 護士叮囑每2-3小時就要落床小便一次。(期間都有醫護人員做記錄, 提點落床小便)

當日腸道很有感覺, 每下一谷排氣(放屁), 傷口就會痛一下, 痛感有如M痛一樣。這情況持續了3-4天。

住院 Day 4: 我可以出院了! 

Jul 18, 2024 a.m - 出院 (10日後到主診醫生診所覆診)

6:40左右, 岑醫生巡房, 檢查傷口

告知化驗報告已出 - 11cm子宮肌癅 + 手術時發現的1cm肌瘤 成功移除, 為良性

判斷傷口沒太大問題, 可以簽紙批准今日出院。

自行預約出院十日後到診所覆診。

醫院開了幾天消炎+止痛藥, 腰封一直keep住戴著, 直到岑醫生覆診當日。

手術住院所有費用結算合共約港幣九萬。

出院後飲食

術後飲食, 沒有預其中吃不消, 反而消化能力強

早餐後每隔兩小時感覺肚餓, 少食多餐

飲食上醫生沒有指明介口, 但一般蝦、蟹、牛、豉油等都自我禁食

每日一碗石崇魚湯 - 營養價值豐富，含豐富蛋白質，奧米加-3脂肪酸, 對傷口癒合很有幫助，是手術後進補佳品

術後一星期內每日感覺

Jul 20, 2024

腹上細孔傷口已埋口, 只有開刀位置有些微感覺 (可能手術後一直有服用止痛+消炎藥)

所以不會有太大痛感。

Jul 21, 2024 

感覺體內器官尺下尺下

排便有困難, 但不能用力谷, 避免傷口爆開, 只能待糞便自行慢慢排走。但糞便偏硬, 排便時間較長, 排不清。 

Jul 22, 2024

多飲水, 順利排清糞便。放屁 頻率亦漸漸減少。

Jul 23, 2024 停止服用止痛消炎藥第一天

傷口有拉扯痛感, 但未至於要食藥止痛。

出院後第十天: 到主診醫生診所覆診

由出院到覆診, 沒有解除過腰封 (只有移位才自行再調整)

期間只用濕毛巾抹身, 避免弄濕開刀傷人 (雖然已有防水膠布貼好, 但緊謹避免)

長期戴著腰封絕不好受, 腰酸背痛感比傷口更加重, 就連訓覺時都不自覺痛醒。

岑醫生撕走了膠布, 傷口已經完全埋口, 但因貼布位置令我有敏感泛紅, 所以沒有再貼膠布, 而附近位置有瘀痕, 為麻醉藥後正常情況, 建議回家熱敷即可。

岑醫生強烈叮囑每年需要做婦科檢查, 避免服用保健產品, 尤其是NMN, 所含成份會令雌激素提升, 如患有子宮肌瘤嘅朋友要注意啊!! 服用NMN絕對會令子宮肌瘤加速生長, 我就是個好例子。

手術後疤痕護理

由於傷口已經埋口, 經醫生批準下, 可以開始在刀痕上使用「喜療疤除疤凝膠」,

喜療疤除疤凝膠有助濕潤皮膚、預防水分經表皮流失, 加快撫平疤痕同埋舒緩疤痕所引起嘅痕癢。特含維他命C、維他命E同埋MPS三效淡印配方, 持久地平復、軟化同埋淡化疤痕。

每日早晚將適量「喜療疤」平均塗上疤痕表面,  的確傷口從未有痕癢感覺, 

宜家我每日keep住用, 之後再比大家睇成效啦!

. 其他平台: Instagram: https://www.instagram.com/keresawong.l.s/ Facebook: https://www.facebook.com/keresawong/ Blogspot: https://keresawongls.blogspot.hk/ Ublog: https://blog.ulifestyle.com.hk/keresawong She.com: https://blog.she.com/keresawong/ 小紅書: https://www.xiaohongshu.com/user/profile/5b230759e8ac2b524de93a5e ESDlife: http://wow.esdlife.com/keresawong Weibo: http://weibo.com/keresawong

(成效圖稍後更新...........)